El Palaciu de Celles, tamién conocíu como Palaciu de La Torre, Palaciu de La Llavandera o Palaciu d'Argüelles, atópase a unos 2,5 quilómetros de La Pola, llegando per una maraña caleyes, lo que fai fácil perdese.
El palaciu foi declaráu Bien d'Interés Cultural pol gobiernu d'Asturies n'avientu de 2003.
Ye
un edificiu d'estilu barrocu, costruyíu a partir d'una torre
baxomedieval. Entamó a faese nel sieglu XVI, agrandándolu y
remocicándolu a finales del sieglu XVII por encargu de la familia
Argüelles, pasando depués a manes de la familia Navia y a lo cabero a los
marqueses de Santa Cruz de Marcenado, los sos propietarios anguañu.
Foi
emplegáu como vivienda hasta mediaos del sieglu XVIII, usándolu como
cuartel les tropes napoleóniques al rodiu del añu 1809.
La so tipoloxía ye la típica de los palacios asturianos con una fachada principal ente dos torres (que nun foron acabaes), un patiu central cuadráu y dos plantes d'altura. Ta fechu con bonos sillares y na fachada, enrriba del balcón central, destaca ente dos lliones un gran escudu coles armes de los Argüelles-Celles y los Navia. Amás ta bien adornáu con frisos, vanos adintelaos, moldures, columnes, capiteles, ...
De la capilla, asitiada xunto a la fachada este, namás queden en pie una parte de los sos muros y una columna toscana, ya que foi destruyía durante la guerra civil, lo mesmo que la portalada del palaciu.
Ver Palaciu de Celles en un mapa más grande
